O Camiño de Inverno é itinerario oficial a Santiago de Compostela desde 2016.

A ruta atravesa as catro provincias galegas, descubrindo ao seu paso as zonas de Valdeorras, Ribeira Sacra e Deza, entre outras.

En concreto, en Chantada aproveita o trazado dunha antiga vía romana e, con posterioridade, Camiño Real. Adéntrase no municipio por Belesar, ascendendo pola ladeira oeste do Miño mediante un trazado de sinuosos cóbados que evitan a forte pendente do terreo. A ruta percorre espazos de grande interese paisaxístico e patrimonial.

Testemuñas deste último son os petos de ánimas, cruceiros, muíños, igrexas (algunhas románicas como San Salvador de Asma), pazos etc.

Na capital municipal, a ruta discorre desde a súa alameda entre casas tradicionais balconadas, algunhas con galerías e soportais, e a súa igrexa con fachada neoclásica. Desde alí, continúa en dirección noroeste ata o Monte Faro.