O Parque Eloísa Rivadulla, ao norte da vila é un dos máis bonitos de Chantada.
Este recinto posúe un forte vencello na memoria e na historia recente dos chantadinos, pois durante moitos anos, até que foi construído o Mercado de Gando actual, este era o lugar onde se celebraban as Feiras Tradicionais de gando os días 5 e 21 de cada mes, de aí que na vila aínda se lle chame o “Campo da Feira”.
Posuía unhas instalacións cubertas con mesas e bancos, chamadas popularmente “pendellos”, habilitadas para comer o polbo que se mercaba na feira. Foron restaurados en 2009 e agora albergan un restaurante-polbería.
É un espazo polivalente, cheo de arboredo e xardíns, cunha curiosa disposición en varias alturas e espazos rodeados por un amplo paseo que acollen un restaurante, a Gardería Municipal, un parque infantil, unha colección de esculturas (algunhas de artistas locais), as Pistas de Tenis Municipais e unha histórica fonte que aínda conserva os bebedeiros que usaba o gando nas feiras.
O Parque Eloísa Rivadulla tamén é empregado para a realización de diferentes actividades culturais, deportivas ou de lecer organizadas tanto dende o Concello de Chantada coma dende colectivos ou público en xeral.
SITUACIÓN
Parque Eloísa Rivadulla
CONCELLO DE CHANTADA | PARQUES E XARDÍNS
ENDEREZO
Praza do Cantón, 1
27500 Chantada
TELÉFONO
982 44 00 11
