Actual, Concello, Novas|

3 de maio ás 20:00h no Auditorio Municipal

A escritora, profesora e xornalista pontevedresa, Fina Casalderrey, presenta en Chantada “A muller xabaril”. O acto terá lugar o venres, 3 de maio, ás 20:00h. no Auditorio Municipal de Chantada. Intervirán ademais da autora, o alcalde de Chantada, Manuel Lorenzo Varela e o escritor e crítico, Manuel Eyré. O acto aberto ás persoas interesadas completarase coa actuación da Banda de Música de Chantada.

Fina Casalderrey foi a pregoira da 41 Feira do Viño de Chantada e dese encontro nace esta presentación como explica o concelleiro de cultura, Manuel Diéguez, “No xantar oficial da Feira do Viño falouse da posibilidade de presentar aquí un dos libros de Fina Casalderrey e desde o Concello fixemos todo o posible para que así fora con esta presentación de A muller xabaril”.

Fina Casalderrey presentara na Feira Internacional do Libro Infantil e Xuvenil que se celebrou nos anos noventa en Chantada o seu premiado libro, O misterio dos fillos de Lúa. A autora, principalmente de literatura infantil e xuvenil, trae a Chantada o 3 de maio a súa primeira novela para adultos na que nos presenta a Adelina, unha muller de apariencia vagabunda e marxinada que agocha unha historia tráxica. A novela escrita en galego xoga co tempo e viaxa pola circunstancia social da ditadura de Primo de Rivera, a Transición, a II República, a Guerra Civil ou a posguerra.

Comments are closed.

Pechar fiestra de busca