O Concello de Chantada a través da Concellería de Cultura prepara unha completa programación para compartir en familia durante este Nadal. A primeira cita é o mércores, 20 de decembro, na biblioteca municipal. A partir das 17:00h acolle a actividade para público infantil, Chegou o Nadal con Gemola.
O auditorio municipal será o escenario de catro interesantes propostas. O día 22 de decembro ás 19:30h acollerá a visita da Apalpadora, encontro ó que se convoca a todas/os cativas/os do municipio. A Apalpadora chega das montañas do Courel para ver como se alimentan cativos e cativas, chega acompañada cos seus tradicionais xogos de madeira e as súas maravillosas lendas.
Para o día 26 de decembro a partir das 19:00h, a cita será con Contacontos Elas de Vero Rilo, espectáculo de narración oral, no que a igualdade ten un importante papel. Golden Magic, un elfo traveso visitará o auditorio, o día 28 ás 19:00h, cun espectáculo de maxia nunha fábrica de agasallos. Xa para o 2 de xaneiro, tamén ás 19:00h contarase con Patruyasos e o seu espectáculo de clown para mergullarse en mundos de fantasías cheos de risas.
Da man de Velaísca, entre o 22 de decembro e o 5 de xaneiro, desenvolveranse os campamentos e talleres creativos para axudar á conciliación neste Nadal. Para participar nestas actividades pódense inscribir na casa da cultura ata o 19 de decembro. Os Campamentos de Nadal destínanse a nenos/as de entre 3 e 12 anos. Celebraranse no pavillón municipal en horario de 10:00 a 14.00 os días 22, 26, 27, 28 e 29 de decembro e os días 2, 3, 4 e 5 de xaneiro. Inclúe servizo de madrugadores en horario de 8:00h a 10:00h. Nas mesmas xornadas desenvolveranse os Talleres Creativos. Estas actividades terán lugar na casa da cultura en horario de 12:00 a 13:30 e destínanse a rapazas e rapaces de 10 a 12 anos.
A programación de Nadal pecharase o día 5 de xaneiro coa visita dos Reis Magos. A tradicional Cabalgata de Reis partirá da DomusVi ás 18:00h para finalizar cun encontro cos nenos/as no auditorio municipal.
O concelleiro de cultura, Manuel Diéguez, anima á participación nas diferentes propostas, “As actividades que organizamos están pensadas para que os máis novos da casa vivan toda a ilusión destas festas. O remate farase coa tradicional Cabalgata de Reis, as carrozas das Súas Maxestades preparámolas desde o concello e cada ano faise un esforzo por melloralas e engadir detalles que fagan máis vistoso ese encontro dos Reis Magos cos nenos e nenas de Chantada”.
